المشهد من فوق الخزان: بسام آغا و”حزب الأربعة فُرسان”… حين تتحول المقاومة إلى تغريدة!
يا أهل لبنان من بحره لجباله، من الجنوب المقاوم إلى طرابلس الصامدة… اسمعوا الحكي من فوق الخزان، من مطرح بعدو في شي ضمير بيقيس الوطنية بالفعل، مش بالحكي الفاضي ولا بعدد المتابعين على تويتر.
نحن في بلد كل يوم بيولد فيه “بطل” جديد على شاشة أو مساحة، وكل واحد عامل حاله “المخلّص”، وهو ما بيعرف يخلّص حتى جملة من دون ما يتهته. وبين كل هالضجيج، طلع علينا “بسام آغا” بتغريدة عنوانها: “سأقول ما لم يقله أحد!”
يا ريته ما قال شي…
“أنا مقاوم إلكتروني”… يا كبير، شو قدمت غير تغريدة؟
“أنا مقاوم إلكتروني”… يا كبير، شو قدمت غير تغريدة؟عم تتحدث عن مقاومة؟ طيب قلنا، شو عملت حضرتك؟
- شاركت بجبهة؟
- زرت جريح مقاوم؟
- زحت ساتر ترابي؟
ولا إنجازك الأهم إنك لبست بيجاما حرير، قعدت على كنباية فخمة، وكتبت تغريدة نارية على لابتوب سعره أغلى من معاش شهيد؟
المقاومة عند أهل الجنوب والضاحية والبقاع مش “تغريدة”… المقاومة دم، تراب، عرق، ورجال بيحموا الوطن مش من ورا شاشة، بل من ورا المتراس.
حزب الأربعة فُرسان: مسرحية تغيير بنكهة قهوة فرنسية
حزب الأربعة فُرسان: مسرحية تغيير بنكهة قهوة فرنسية“حزب التغيير”، يلي عامل حاله مشروع سياسي، فعلياً مش أكتر من “مجموعة واتساب” فيها أربع أشخاص، بيلتقوا بكافيه بيروتي وبيحكوا عن تحرير لبنان من فوق الفناجين.
هالناس:
- ما بيعرفوا كيف عم تنسرق الكهرباء.
- ما بيعرفوا ليه الخبز عم يغلى.
- ولا كيف البنزين صار بيحدد هوية المواطن.
بس طالعين ببيان بعد البيان، عن “السيادة” و”التغيير”… يا ريت غيروا ترتيب الكراسي بالمقهى قبل ما يغيروا البلد.
مقاومة صالونات؟ خلّيها إلك!
مقاومة صالونات؟ خلّيها إلك!للأسف، البعض صار يزايد على المقاومة من الصالونات المكيفة، وعم يحاول ينطق باسم الطائفة الشيعية، أو يدّعي أنه “وجه حضاري” لها. وهون المصيبة.
المقاومة مش طائفة.
المقاومة حمت كل لبنان، بكل طوائفه، وكل مناطقه.
المقاومة ما بتطلب إذن من سفارة، ولا بتاخد تمويل من منظمة، ولا بتركب على موجة الترندات.
المقاوم الحقيقي، لما بيشوف أرضه مهددة، ما بيغرد، بيقاتل.
رسالة لأهل لبنان:
رسالة لأهل لبنان:لا تصدقوا كل من بيرفع الصوت باسم المقاومة وهو قاعد على البراندة.
المقاومة فعل، مش استعراض.
صمود، مش استبيان.
موقف، مش تغريدة.
واللي ما بيعرف شو يعني “دم شهيد”، يسأل أم شهيد، مش محلل على تويتر.
من فوق الخزان بقولكم:
من فوق الخزان بقولكم:إذا بدك تكون مقاوم، مش ضروري تحمل بندقية، بس عالقليلة ما تكون عبء على اللي حاملينها.
لا تزايد عاللي بيحرثوا الأرض وبيزرعوها أمان.
ولا تحكي عن السيادة وانت عم تستورد مشروعك من الخارج.
وإذا فكرت إنك تصير زعيم بتغريدة، فتذكّر إنو يلي عملوا المجد، ما عندن حساب تويتر أصلاً… عندن شاهد قبر وراية عَ الجدار.
كتبها: محمد قاسم
“من فوق الخزان”
(سياسة | ساخر | حزيران 2025)
